Dayo Wong 3

黃子華,被公認為「香港的棟篤笑鼻祖」,他更是2013年度的無綫視帝。

温叔叔第一次欣賞子華兄的台上風範,便是在92年跟炯叔叔一起到伊館去看《跟住去邊度》。時光飛逝,在棟篤笑中轉眼間已快將廿二年了。

今日正是Dayo兄的54歳生日,不如我們就重温一下這「神級笑匠」的金句,一方面可細味一下黃子華的嬉笑怒罵人生,另一方面又可藉此跟他分享生日的喜悅。

• 做人處事

若要人不知,唔好太低B。

我唔係一個唔負責任嘅人,為我爸爸媽媽果短短一剎嘅快感,我已經負責負咗好多幾年。你估做我好易做啊?
我細個讀書唔好,或者唔合格,我冇要父母負責。我自己簽晒啲成績表嘅。
每當我爸爸媽媽有爭執鬧交嘅時候,我有冇叫佢哋為咗我嘅童年著想而忍讓下對方吖? 冇! 我叫佢哋出街鬧!
到我大個咗,唔知應該信邊個宗教,唔知做人為乜,唔知人生事業嘅方向,我都冇要求父母照顧我。反而係我調番轉頭,提醒佢哋:你哋要搵錢啊,積穀防飢啊,唔係第日老來無依無靠啊!
乜嘢都係我!

有恩不報未算差,有仇不報正人渣。

大自然所有嘅動物都喺食物鏈上,鏈的下層俾鏈的上層吃,一層一層咁鏈上去。
人類有人類自己的食物鏈,人類的食物鏈簡單好多,祇有三層。最下層係「無產」,中層係「中產」,頂層係「冚家產」。當中係絕無不敬的成分㗎。
因爲頂層喱D人擁有嘅唔係房產,權產就係遺產,名副其實冚家都係產。所以我哋好多時叫冚家產會加乜嘢吖?「冚家富貴」。

老闆,佢俾份人工你,一半係俾你做嘢嘅,一半係俾你受氣嘅。

• 談情說愛

依家D人溝女,對條女最大嘅要求係乜呀?
唔係靚喎,最緊要,係要夠新鮮!乜嘢叫做夠新鮮呀?
就係話,溝咗一年果個,就唔夠溝咗半年果個咁正。
因為半年果個新相識,新鮮D。
同樣,溝咗半年果個,就唔夠三個月咁正。
溝咗一個月就唔夠半個月果個咁正。
溝咗一日就唔夠半日果個正。如此類推,終於…
溝咗果件,就唔夠未溝果件咁正!
咁即係點呢??
仲溝唔溝好呢? 一溝就唔正!!!

失戀係會令人成長嘅。
我失戀之前,一向都覺得世界上所有問題都有答案。
點解我哋每日都要八點鐘起身返工呀?
因為夠鐘囉。
點解我哋有夠鐘呢樣嘢呀?
因為我哋唔用浮動上班時間囉。
點解呢個世界有戰爭?
因為我地有武器囉。
咁點解我地要有武器呀?
因為佢地有武器囉。
一切都有答案,直到我失戀…
阿珍,點解你唔愛我?
阿珍俾咗一個經典嘅答覆我,佢話:
「愛情係冇點解㗎,係唔可以解釋㗎,唔好問啦!」
如果返學阿Sir問我嘢都可以咁答就好嘞!
「黃子華,物體燃燒點解需要氧氣呀?」
「阿Sir,燃燒係冇點解㗎,冇得解釋㗎,唔好問啦!」

你落咗妝,我仲認得你,果啲就叫做「化妝」。
你落咗妝,我唔認得你,果啲就叫做「喬裝」啦!

我唔係靚仔,我祇係襟睇。

我係絕對唔會鍾意你,而你亦都應該絕對唔好鍾意我,你跟住我喱啲藝術家係無幸福嘅,而我被你跟住就更加無運行喇!

Dayo Wong 2

順帶一提,子華下個月會開楝篤笑show,你們已購票捧場嗎?到時我們大家一起叫他「除褲」和「回水」吧!